【珍珠奶茶原來係醫護人員至愛？】
炎炎夏日，買杯冰凍珍珠奶茶，珍珠咬落彈牙煙韌，茶底嗒落清香夠濃，真係人生一大樂事！不過你未必知，珍珠奶茶除咗受年輕人歡迎外，原來仲特別受醫護人員歡迎！
你知、我知、單眼佬都知，珍珠奶茶係好飲，不過糖分比較高，飲得多真係唔健康，但係點解負責守護健康嘅醫護人員經常飲呢？全因四隻字——工作太忙。由於人手不足，醫護人員經常疲於奔命，食餐飯都未必有時間，所以提供飽肚感同埋充足熱量嘅珍珠奶茶，就成為佢哋解決飲食需要嘅好選擇。
後生仔當消暑飲品，醫護人員當充飢正餐，證明同一件產品，可以fulfill唔同市場。做生意嘅，只要喺「產品用途」層面多加思考，自然吸納到更多消費者幫襯。
好似喺美國，奶昔又係一個好例子。喺朝早，唔少司機都會買奶昔，喺揸長途車飲奶昔可以打發時間，亦令佢哋無咁容易肚餓；喺晏晝，買奶昔較多會係家長，買嚟獎勵自己小朋友。如果做售賣奶昔生意，喺上晝，推出較濃郁嘅奶昔，等司機飲落更加飽肚；喺晏晝，推出Size較細嘅奶昔，或者加色彩繽紛朱古力豆，令小朋友食落更開心。如果識咁樣靈活使用市場策略，適時tune一tune產品，生意或者又會輕鬆翻一翻了。
你覺得珍珠奶茶可以點樣攻佔更多醫護人員市場？
Search